Ka hmangaih che

Ka bo zo, kalna kawng chu.
Ka tlu, tuin nge mi kaitho ang?
Chhingmittui a far, tunge hru hul ta ang le?
Ka lungngai, hnemtu ka tawng si lo.
A na êm e, tu'n an hrethiam lo.
Ka nui ve, lenrual zingah,
a tap tho si, ka lairil.
Fam dairial êm ka la chang lo,
Mahse i tan ka thi ta si.
Ka ngai êm che,
Mahse a khingbai lua.
A nguai zo, hlima nui thin kha,
A dang zo ta, hringnun kalsiam.
Nunhlui ka ngai bang lo.
Sawt tih ni reng awm chuang lo.
Ka au che, mi chhang si lo.
Lâm ang i lo let leh hun,
Beiseina nen ka thlir reng che.
Bei chu a dawng tho si.
Ka inhrilh nawn fo thin,
'Ka hmangaih lo' tiin.
A pha thei chuang si lo,
He ka thinlung hian,
'Ka hmangaih che' tih mawlh mai hi.

Ve mai mai

Ka duh che ti chung siin,
A tha par dang lo melh thin che maw?
Ka tan i mawi ber ti siin,
Lanu leng i chhai fo si a maw.
I ngaihvarung thawn mai pawh,
Hmangaih biahthu zu hlan ta a che.
Hmangaihna i ngah viau em lo ni zawk?
Lairil fantu hmangaihna chu,
I sem zai thiam ngei e maw!
Hringnun tihlutu he hmangaihna hi,
Thu ho têa chantira,
A hlutna ti bawrhbangin,
Lanu lungmawl thinlai hneha'n,
I hlan ta mai thin zawk em ni le?

Nang nen intawng lehin

Hlimten nang nen intawng lehin.
Kan rûn sang rawn lawi leh la.
Tapchhak zåwlah se se thu di hlan lehin.
Lam ang lo let leh se,
Lairil hmangaihna duhawm,
Ngai têa leng dûn lehin,
Nunhlui ninawm zawngte,
Nghilh zai rel ila.
Lo dam leh se, hliam zawng pawh.
I din thar leh ang, kan nun.
Nang nen duh thu kan sam thin zawngte.
A tak ram an chang tawh anga,
Nang ngaia luaithli nul ka bang tawh ngei ang.

Vanglai Nun

A lang tlang dum dûr saw,
A bawm chiai e, romei zamin.
Min zêm khawtlang lunglenin.
Hawi vel ila, tlang tin leh mual tin,
Thlir nin a har ngei, Siamtu kutchhuak.
Suihlunglen ti zual turin,
Lelte a kiu vawng vawng,
Siahthing zarah sirvate'n zai lo sa e.
A hring nghial mai, sawmfång hmun.
Lawm rual hlimten nui zain ka ring e.
Ka lawm pa kha tel ve tak maw?
Siktui thiang an dawn za ngei ang.
Leng dawn tuaii nui ri nen,
Aw liam mai tur panlai nun hi,
Ka phal lul lo, chula uai leh maia'n,
Theih ni se, chelh din reng ka nuam e.
Hai ang ka lo tar ve ngai chuan,
Kei zawng ka sawi bang lawng,
Vanglai nun hlimawm.

Ka hmangaih che

Lenrual zingah nui ve thin mah ila,
ka tahna ah ka chau zo ta a.
A keh zo ta, he thinlung hi,
Ka tan tahna mai zawng i ni tehlul mai!
Mahse maw, thazual,
Nang nghilh che ka bang thei si lo.
Lenglerh chan chang mah la,
I anka dam diaia,
Min tiam rinawmna zawng kha,
A cham reng tho si,
Ka lairilah.
Thinlung nain mi kalsan mah la,
Kan hlim lai nite mitthla an a cham tho si.
Ka tan doral ni mah la,
ka haw thei chuang si lo che.
Nitinin nang vangin tap mah ila,
Nang ngaih ban zai ka rel thei chuang si lo.
Natna bak min thlen lo tih hre mah ila,
Lam ang lo let turin ka duh si che.
Engdang vang a ni lo,
Ka hmangaih êm che a ni.
(14.01.2012)