Duhtak, dam takin mangtha le

Duhtak,zanin chu e, zan danga eng de sep sep thin vanzawl mawitu arsite pawh an bo duak a, i truanna mual min thlir tira nang ngaih tizualtu Thla meuh pawhin thenna thu kan sawi chu ngaingam lovin a bibo ta a nih hi.

Ka chung vansang tak chu ka thlir a, chhum dum chhah em emin a hliahkhuh tlat a. Ka bianga ka mittui far hi min trawmpui ni awm takin ruah a sur seng seng a sin. Zandanga ral lehlam tlang lang cham dur maite kha zanin chuan thimin a hliah zo si a.

Duhtak, a pawi a ni tiraw, hei bak enge ka sawi chuan ang le? Ka thinlung chuan a hlat phal lo che a, mahse he ka chhia leh tha hriatna hian nang hnaih che hi rem a ti tlat si lo a ni. I kianga awm kha e, ka ning ngai lova, ka thlahlel ngawih ngawih che a ni tih nangpawn i hriat kha.

Mahse tunah chak lo leh hreh takin thenna thu kan sawi dun ta si a. A hrehawm dan teh dawn se, hei bak enge awm chuang ang le? Mahse duhtak, kan pahnih hian engtikahmah kan leng dun thei dawn si lova, ka na ka tuar zawh loh hma ngei leh he chhia leh hriatna fim taka ka ngaihtuah theih lai hian ka tih loh chuan e, a tlai zo ta tih mai kha ka chan a ni dawn a sin.

Duhtak,hei hi hre rawh aw, ka tana i inhuamnate, engkimah khan ka lawm a. I tawngkam tha mai ni mah se, ka thinlung zawng zawng hi i tihlimin i tinui thin a sin.

Khang hun chhung zawng zawng khan ka ngaihtuahna ata i kalbo ngai hek lo. Ka ngai thin takzet che a ni. Hei pawh i hre lo ang, nang ngaih a reh nan thil atthlak tak tak ka ti thin tih hi.

Chuan maw, duhtak, nang ang hi tawng leh ngai pawn ka inring tawh lo, i mi ngaihsakna awka dam diaite kha a mawiin ka lungngaihna pawh a hnem sawng sawng thin a sin. I tan ka tling zo lo erawh pawi ka ti a ni. Min ngaidam ang che aw.

Duhtak hei pawh hi ka hre reng thin a sin. I lakah chuan ka insit a, engmah ka nih lohziate, i tawngkam tha mai mai chauh ka dawng tìh hi. Chuti chung chuan ka hlat phal chuang si lo che a. Chung zawng zawng haider chuan nang ka vuan ta che a nih kha .

Mahse hei hi ka chhia leh tha hriatna te chuan nitin min hrilh thin.Nite an rala, ka ngaihtuahna fim tak hmang thei lo hial khawpa ka hmangaih hunah che chuan engtakin nge nang hian mi deuhsawh ang tih hi. Ka ngaingam thlawt lo a ni. 

A tawp ber atan chuan hlim takin leng la, mahse mi han nghilh bik suh aw. He lei piah lamah chuan hlim takin nang nen kut insuihrialin kan hun tawnte kha i sawi dun leh ang aw. Chutìh hunah chuan ka ta i ni tawh anga, lenlai a rual si lo kan tithei tawh lo anga, kan karah daltu a awm tawh hek lovang. 

Duhtak, chu hmun lei piah lam ram, paradise an tihah ngei chuan innghak dun ang aw.

Dam takin,

MANGTHA LE.

5.9.2012