Lasi thawnthu kha

Nizan lamte tlaivar zan a nih vang nge ni, zan dang ang lo takin zanin chu a reh thruap a. Thawm riva leh mihring thawm reng reng hriat tur a awm lo.Hun hlimawm tak, kumthar ni ni mah se, keizawng,he zan khawhar leh reh tak hian min thram vel a, ka lairil a fan leh ta a nih hi.

Van chu ka han thlir a, a thiang mawiin van zawlah arsi an de sep sep a, ka arsi tia ka lo chhal thin, ka naupan lai ata tawh zan tin a lang em tia,ka lo thlir thin chu vanlaizawlah lo lang thiang rualin, khawchhak lama eng chuai raih thla mang lam tawh chuan phairuama tiauchhum luipui ang maia cham dul chu a chhun paw deuh phut a. Lasi thawnthu ang mai ani.

He thlasik boruak vawt takah hian zan danga thawm chhuah thin perhpawng leh khuangchirite pawh an buah vawt tiin an tawm tlat a ni ta ve ang,thawm chhuah zai reng an rel bik lo. Boruak chu hikin vawt hle mah se, thli thaw reng a awm lo a,kan kawmchara fartuah kung thliin a chhem rik sung sung thin pawh chu che miah lovin a ding a, dai rawn far ri leh keuh thin bak chu thawm hriat tur a awm lo, a reh hian a reh tlawk tlawk mai a ni.

Nui ri a reh zo a,tawng thawm a bo zova, mahse thawm reng reng nei lo he zan reh tak hian ngawi rengin thawm ring tak a rawn chhuah si zawng a nih hi. Lunglen a kai tho leh a, hmana ka nun riangvai takah khan trul lovah min hruai kir leh ta a nih hi.

Ni e, ka naupanlai chuan mal leh khawhar takin ka awm a, thian tia sawi tur chu tam tak nei ve mah ila,lunglen hi enge a awmzia tih ka hriatthiam hma hauh ata tawh ka khawhar ru veng veng thin a nih kha.Mahni chauha awm chu nuam tizawkin lehkhabu tam tak ka chhiar thin a,chu chuan duhthusam ramah min hruaiin lasi khawpuite chu ka fang vel ta thin a nih kha.

Kum a vei zel a, chutiang zelin kan kumte pawh hriat loh karin a lo tam ve zel a,mite ngaihah chuan nula pangngai kan lo ni ve ta reng mai. Mahse ka kum upatna chuan naupangte ka nih laia ka suangtuah thin khawvel kha ka la paih thei chuang lo.

Lasi thawnthu tam tak ka chhiar thinte kha atakah awm ve turin ka ngai a,cinderella thawnthu ang maiin,ka nunah hian lal fapa chu rawn lang ve dawn tlata hriatna ka nei a, ka ring tlat bawk thin,chu lalfapa chuan chu nula rethei tak chu hmangaih tawp lova hmangaihin a tawpah hlim takin an awm dun ta a nih kha.

Tunah tu emaw chu ka nunah lo langin ka tawng ve ta a, lasi thawnthua lalfapa ang maia nunnem leh zaidam chu. Mi pahnihte inkarah chuan hmangaihna par rimtui tak chu a leng chem chem a,dawithiam pitar leh phiarrutu te lo awm thin mah se, chumi te pahnih chu engmahin a dal zo lo. Hmangaihnain a phuar dun tlat avang chuan a tawpna chu hlimnaah a lo chang thin si a.

Mahse hei erawh tunah ka hre ve ta,,lehkhabu leh tva ka lo hmuh thinte kha phuahchawp mai a ni a. A takah a lo awm ngai reng reng lo. Tu emawin a duhthusam thinte, rilrua a suangtuah thinte a ziah chhuah ve na mai chauh a lo ni. A tak takah chuan hmangaihna chu tahna a lo ni zawk reng mai nia mawle.

2.1.2013