Rairah riang

Tuiril mai ka nih lai ata tawh,
Ka chunnu leh zuapa lu ka ti hai lua.
Khuavel eng hmu ve ngai lo turin.
Ka zuapa'n a neih sum a phal tam ngei,
A thiam tawkin anka a hlan, ka chunnu.

Chúnnu lairil a na vawng vawng,
Chhunni leh zan hlim lai rêng nei lo i;
A zuam mawlh lo, a cho lul lo.
Kei a riang puan ang hnawl chu,
Chhingmittui a súr bång lo, chùnnu biangah. 

Ka zuapa'n derna ånkain lém mah se,
Damchhung hrehawm tur phur zo loin.
Ånka lo hnawl hråm e, ka chunnuin.
'A zahawm a lawm le, Chung Pathian' tiin,
Muala'n a liam ta, ka zuapa.

Hmangaihna tel lo, nawmsakna mai vanga,
Lo awm kei ariang vang chuan.
Ka chûnnu'n phur zel e, selna anka zawng,
A nat teh lul nen, zuapa hmangaihna.
A tam lua, tlangrel meuh han phurh chu.

Chúnnu lungtingai zual turin,
Mîm ang ka lo piang ve ta chêng a.
Ka chúnnu chhingmita thlapháng hmel kha.
Lo hmu thiamin hrethiam ila zawng,
Ka hmu ngam hlei lawng e, khawvel êng hi.

Khuanu zarah damten ka lo seilian ve e.
Chunnu mala'n ka tlei dawn chauh emaw ka tih laiin,
Leng dang a chhai, ka chunliani'n,
Kum sûl tam vei loin mi nu thai a chang ta si.
Zuapa'n ka hrai tih reng mi tum si lo.

Thing delh lo, lung delh lo chu seilian zelin,
Zirna rûnpui ka lo bel ve a.
Duah a tam tual tual, mamawh a pung.
Tu bulah nge maw ka'n thlen ve tak ang?
Ka chúnnu leh zúapa ko phåk si lo e.

Riahrún vai mah suh ila,
Khawi hi nge ka rûnin ve chu?
Laikhum zâlin ka tap, ka bang thei lo,
Ka dem leh thin, ka chûn leh zúate kha,
Tapa rûmin tlai khua ka var leh thin.

Hawi velin, laitual han leng mah ila,
Ka hai bil lo, sitna mitmeng chu.
A vang lua a riang tan, then leh rual tha.
Tapin rûnin hliapan tlan mah ila,
An awm ve si lo, hmangaiha mi lo dawmtu.

Chún leh zuaten min chawi lian lo mah se,
Kei mi lo chawi liantu, Chung Pathian.
Kei ariang hi tapa rum chang ni tam mah se.
Mi hnema mi lo pawm thintu.
Ka tan ka chunnu leh zuapa chu,
Chung Pathian engkim ruattu lo ni e.