Ka phût lo'ng e

I lairil chu lengdang tan niin,
I sakruang chuan mi hlat tawh mah se,
I zunzam par rimtui leng vel hian,
Kianzai reng an rel ve si lo maw.

Kan kara'n mel za tam awm lo mah se,
Ka hnaih phakah i awm ta si lo maw!
I anka dam diai hre thin mah ila.
Ka tan anka i hlan ngai ta si lo.

Hlimin i nui a ni tih hre mah ila,
Keimah vanga nui i ni ta si lo maw!
Lungngaia i tah chang ni lo thlen pawhin,
Hnem tur chein kei mi ko ngai ta si lo..

Nang ngaia i sakhming ka lam chang hian,
Vawikhat tal pawh mi lam ve ta si lo.
Sulhnu chhuia luaithli ka nul lai hian,
Duhtak hmatiang min thlir san ta si maw.

Mahse hei chauh hi ka ngen a che.
Vawiin chauh atan pawh ni se e,
Aw vawikhat tal ka tang bel leh la,
Eng thu mah i sawi ka phut lo'ng e.

Zan

Chhunni kawla'n a lo her liam a,
Beiseina ten mual an liam zova,
Tlaikhua a lo thim tial tial a,
Beidawnnain hringnun a thim hnan e.

Dai leh kawtthlerah a vak vel a.
Thla reng a eng lo, si ar zawngte pawh.
Lungngaihna zo chhum ang a zing ruai a.
A tlu e, lamtluang thima'n.

Chu zan thim hnuaiah chuan,
Tanpuitu tur zawngin a au ruai a,
Tumah rengin an chhang si lo,
Chhingmittui a luang a bianga'n.

Chhungril rum lairil tap chuan e.
Ko hnai e, thihna kut vawt chu.
Damlai thlan thim belh reng ai chuan.
A thlang zawk e,thlafam chan.

Hei erawh hre ve se zawng,
Fam chan a thlang bik hlei lo'ng e.
Khawi hmunah pawh awm ni ila,
'Hmangaihtu Isua chu a hnai reng' tih hi.

Awmkhawhar suihlunglen

Tlai khua a lo thim chuan,
Vala'n a di run sang a lawi a.
Zankhua hrui ang sei kha e,
A tan zawng hriau ang a tawi lua e.
Mahse zan khua tlaiin mangtha tih a tul leh thin.

Tlaikhua a lo thim chuan,
Lengi'n nghakhlel takin lo thlir e.
A di vala khartung rawn sawn chu,
Tapchhak zawlah se se thu di an hlan,
Mahse zankhua tlaiin mangtha tih a tul leh thin.

Tlai khua a lo thim hian e,
Ka rian khua tisei tur renga'n,
Mahten kan run ka nghak a,
Awm khawhar suihlungleng hian,
Zankhua ka hmang ral leh thin.

A riang mang e!

Zingkhua lo var thin bawk mah se,
A zin kawng erawh a thim lua,
Tukthuan ril fah zo tur zawngin,
Lamtluang zawh zai a rel a.
A mi leng khawngaihna dil chung zelin,
A chawnban riang a phar vel e!
A tawng nem maw?
Vawikhat bar tal pawh.

Khua a lo ngui a, thlipui a lo tleh ni chuan,
A sakruang riang te kha khur zo ve,
A nei si lo maw, silh leh fen lum,
Ami sumtual fang zel chung khan,
A zawng ruai, riahrun rem vena tur,
Tu'n an duh lo, an kawtkai mawi tura'n,
Riakmaw iangin riahrun a vairuai e.
A hek tham nem le, kawtkai chauh tal.

Tlai ni kawl a lo liam a, Zankhua a lo tlai chuan,
Daifem lamtluang mahte'n a zawh a.
Siahthing zar hnuaiah riahbuk chu sualin,
Zanmu chhin zai a rel ve e.
A tawnmang ram tal zawng,
Damlai pialral chang teh se.

Duhtak

Duhtak, eng thu mah sawi teh suh,
I hliam chu ka hmuh hmaih lul love,
I lairil thianghlim leh duhawm,
Na tuara rum ri chu ka hria a sin,
Ka kiangah lo kalin ka trangah lo bei la,
I thinlung hliam hnu ngei kha
Duatte'n ka tuam dam leh nang e.

Duhtak, ka mitah hian han en la,
I chhingmit meng mawi tak kara,
Lungngaihna mittui lo luang chhuak chu,
Ka hmu theiin i ring phal em ni?
Ka kiangah lo kalin ka trangah lo bei la,
I thinlung hliam hnu ngei kha,
Duatte'n ka tuam dam leh nang e.

Duhtak, ka chawnbanah kai la.
Kumtluangin ka thlah phal tawh lo'ng che.
I nat leh ka phal tawh lul lovang,
Nitinin ka hmangaih dawn si che a.
Ka kut vuanin ka trangah lo bei la,
I thinlung hliam hnu ngei kha,
Duatte'n ka tuam dam leh nang e.

Ngai ve ang maw

Ka chung tûrni thlang lenkawlah a lo liam a,
Zan thlifim a lo leng a e!
Suihlunglen ti zual tur reng hian,
Ka tah khua tisei thlawn mai turin,
Chhawrthla leh si ar lo eng ri riai e.

Ngaihlai bång ve ang i maw?
Hmana ka di nuimawi te kha,
Nghilh ni awm lo, a nunze ril mawi leh duhawm,
A tanga bei lai ni zawng mitthla'n cham reng si a maw,,
Lairil hian sam ang then zai rel thei si lo i.

Mahtea a awmhar chang ni chuan,
A suihlung leng ve hian ka ring thin e.
Ngai ve ang maw, par ang lawmlai ní,
Nunhlui zamual liam hnu a dawnkir changin,
A lairilah cham ve tak ang i maw, kei ariang hi.

Ka lenrualte kha

Hlimni lo thlen changa mi nuihpuitu,
Lungngaih chang nia mi hnem ṭhintu,
Ka lenrual duh ve zawngte kha,
Khawia'n ṭuanzai rel ta ang maw?

Harsatna leh manganna ten mi hual vel a,
Beidawnna zo chhum ang lo zingin,
Lairil nain ka rum vawng vawng,
Min hnemtu reng ka tawng si lo.

Hmanah chuan ṭhian ṭha tiin ka chhal,
Chinlai unau nen a dang chuang lo.
Mangang ni lo thlen hian,
Khuai ang min rauhsan ta si e.

Kei zawng hringmi leng zawng zingah,
Ka van a duai chuang bik em ni?
Nun ruak leh khawhar tak hian,
Chhunni leh zantin luaithli ka nul bik tak mai le?

Tu emaw chu

Laikhum bela zanmu i chhin lai khan,
A riang thinlung chavai tak hi,
Tu emaw ngaiin ka tham vel a,
Duh tin sam hian tlaikhua ka var leh mai awm mang e.

Sakruang nei mah i, thinlung ruak si e;
Ka lairil luahtu tur ka vai si a maw!
Thinlung khawhar hnem thiama'n,
Tu emaw ngaiin ka tham vel e.

Ar ang mi chhai ve ka tawng lo bik nem maw?
Hmangaihna ngena ngai si hian,
Ka tawng si lo, lairil luahtu,
Tu emaw awm ve tak ang maw,a riang tan hian.

He nun khawhar leh riangvai tak hi,
Tu emaw vangin hlimin lawm ve se aw,
A kiam mahna, tui ang lian khawharna zawng.
Nghak zel mai ta'ng e, tu emaw chu.

Chhawr loh thla

Chhak lenkawlah chhawrthla a eng ruai a,
A mawinain leilung ên ri riai e.
Thinlai mu hnu zawng kha lo tharin,
Mitthla'n sulhnu a cham thar leh e.

Hmanah chuan chhawrthla eng hnuaiah,
Duatte'n tangah pawmin,
Hmangaih biahthu kan hlan thin a.
Kan tan chhawrthla chu a mawi chuang bik e.

Tunah zawng mahte'n chhawrthla ka thlir tàk hi,
Di nena kan hlimlaini zawng,
Nunhlui pialleia tham ral tawh hnu kha,
Ka dawn tawk lek a lo ni ta si maw?

Di zun ngaiin chhawl ang ka uai zova,
A ngaiin chhingmittui a luang, ka bianga'n,
Ka han ko, mi chhang ta si lo.
Zamual liam ta kha kir leh ni awm ta si lo.

Ami leng kawpten chhawrthla eng an lawm laia,
Mahriaktea chhawrthla thlir reng zawng,
Min tiriang tam thlawn e,
Kei ka tan ve zawng chung chhawrthla khi,
'Chhawr loh thla' tih mai ka nuam mang e.

7.3.12

A der

Biahthu mi hlan zawng kha.
Biahder mai maw lo ni?

Rinawmna mi tiam lai khan.
A rukin lengdang i lo chhai si a maw?

'Kumtluangin aw' tia mi hlan kha,
Kum sul tam pawh vei lovin i sut leh si a maw?

'Ka hmangaih che' tia mi hlan kha,
A der mai maw lo ni?

Ka hmangaih em che avang hian,
Pawnlang hmangaihna mai chu ka lo ring ta si a.

Ka hlimna ve thin zawng kha,
Tahkhua tisei tura'n a chang zo ta maw?

Mambawihi

Khua chu a duai ruih a, thli chu a thaw vuk vuk a. Chhûm chuan a lungngaihna hriatthiampui niawm takin vanzawla ni chu an lo hliah ve mek bawk a. Khua lah chu a reh hian a reh tlawk tlawk a. Motor tlan thawm ri hriat eih tur pawh a awm hek lo. Bathroom kawngkhar chu a kalh tha em tih a han check tha leh vek phawt a, a inkalh tha vek a ni tih a chian hnu chuan hrui chu muangchangin a han valh a, darthlalangah chuan a han inen a, a hmel chu lungngaihna leh beidawnna nasa tak avangin a thu bul a, a mit khurte chu a tahna a nasat avang leh zan a mut tlem êm avangin a val kulhin a tla dûk tawh a. A heh ro lutuk chu a han liak huh lap a.

Duhaisam

Hai ang lo tarin,
Sakhmel mawinate chu lo chuai mah se,
Ka tan i mawi reng fo ang.
Engpawh lo thleng se,
Hlim leh lawm, lungngaih chang pawhin.
Rinawmna kan tiam sut leh mai lovin,
Hmangaihna hrui i vuan dun zel ang aw.
Chutin duhlai,
Panlainunte hril dunin,
Zawlpuan kan sin dun ang a,
I sakhmel mawi tak chu,
Thlir nin ni reng ka nei lo'ng e.
Laikhum thlehnemah se se thu di ka hlan bång lo'ng che.
Ka hmangaih che

Ka hmangaih che

Ka bo zo, kalna kawng chu.
Ka tlu, tuin nge mi kaitho ang?
Chhingmittui a far, tunge hru hul ta ang le?
Ka lungngai, hnemtu ka tawng si lo.
A na êm e, tu'n an hrethiam lo.
Ka nui ve, lenrual zingah,
a tap tho si, ka lairil.
Fam dairial êm ka la chang lo,
Mahse i tan ka thi ta si.
Ka ngai êm che,
Mahse a khingbai lua.
A nguai zo, hlima nui thin kha,
A dang zo ta, hringnun kalsiam.
Nunhlui ka ngai bang lo.
Sawt tih ni reng awm chuang lo.
Ka au che, mi chhang si lo.
Lâm ang i lo let leh hun,
Beiseina nen ka thlir reng che.
Bei chu a dawng tho si.
Ka inhrilh nawn fo thin,
'Ka hmangaih lo' tiin.
A pha thei chuang si lo,
He ka thinlung hian,
'Ka hmangaih che' tih mawlh mai hi.

Ve mai mai

Ka duh che ti chung siin,
A tha par dang lo melh thin che maw?
Ka tan i mawi ber ti siin,
Lanu leng i chhai fo si a maw.
I ngaihvarung thawn mai pawh,
Hmangaih biahthu zu hlan ta a che.
Hmangaihna i ngah viau em lo ni zawk?
Lairil fantu hmangaihna chu,
I sem zai thiam ngei e maw!
Hringnun tihlutu he hmangaihna hi,
Thu ho têa chantira,
A hlutna ti bawrhbangin,
Lanu lungmawl thinlai hneha'n,
I hlan ta mai thin zawk em ni le?

Nang nen intawng lehin

Hlimten nang nen intawng lehin.
Kan rûn sang rawn lawi leh la.
Tapchhak zåwlah se se thu di hlan lehin.
Lam ang lo let leh se,
Lairil hmangaihna duhawm,
Ngai têa leng dûn lehin,
Nunhlui ninawm zawngte,
Nghilh zai rel ila.
Lo dam leh se, hliam zawng pawh.
I din thar leh ang, kan nun.
Nang nen duh thu kan sam thin zawngte.
A tak ram an chang tawh anga,
Nang ngaia luaithli nul ka bang tawh ngei ang.

Vanglai Nun

A lang tlang dum dûr saw,
A bawm chiai e, romei zamin.
Min zêm khawtlang lunglenin.
Hawi vel ila, tlang tin leh mual tin,
Thlir nin a har ngei, Siamtu kutchhuak.
Suihlunglen ti zual turin,
Lelte a kiu vawng vawng,
Siahthing zarah sirvate'n zai lo sa e.
A hring nghial mai, sawmfång hmun.
Lawm rual hlimten nui zain ka ring e.
Ka lawm pa kha tel ve tak maw?
Siktui thiang an dawn za ngei ang.
Leng dawn tuaii nui ri nen,
Aw liam mai tur panlai nun hi,
Ka phal lul lo, chula uai leh maia'n,
Theih ni se, chelh din reng ka nuam e.
Hai ang ka lo tar ve ngai chuan,
Kei zawng ka sawi bang lawng,
Vanglai nun hlimawm.

Ka hmangaih che

Lenrual zingah nui ve thin mah ila,
ka tahna ah ka chau zo ta a.
A keh zo ta, he thinlung hi,
Ka tan tahna mai zawng i ni tehlul mai!
Mahse maw, thazual,
Nang nghilh che ka bang thei si lo.
Lenglerh chan chang mah la,
I anka dam diaia,
Min tiam rinawmna zawng kha,
A cham reng tho si,
Ka lairilah.
Thinlung nain mi kalsan mah la,
Kan hlim lai nite mitthla an a cham tho si.
Ka tan doral ni mah la,
ka haw thei chuang si lo che.
Nitinin nang vangin tap mah ila,
Nang ngaih ban zai ka rel thei chuang si lo.
Natna bak min thlen lo tih hre mah ila,
Lam ang lo let turin ka duh si che.
Engdang vang a ni lo,
Ka hmangaih êm che a ni.
(14.01.2012)

I liam ta si maw

Thaleng dang tam mahse,
Ka riang chuang ngei, Zaleng hei zawng zingah,
Min hnem thiam reng ka tawng si lo.
A nguai zo, ka nunkhua,
I ngai hian chhun ni zan ka hmangral fo.Ka au che, mi chhang si lo.
Ka mamawh che a, nau ang tlei nan,
Mahse i liam ta tho si maw.
Ka tan ka damna dawi i nih i hai lo.
I haider, ka tan a na chuang ngei,
I sulhnu leh hlimthla ka chan tawk lo ni.
Chu chuan luaithli a ko tam mai thlawn e.
Lungngaia tahna chauh mi hnutchhiah hian,
Koh din rual lohin i liam ta si maw?

Ka puar zawk awm mang e!

Tlai ni a liam a,
Hlim lai ni an chuai,
Nunhlui zawngten zamual an liam a.
Nunhlui ngaia tlai ni len reng ai chuan.
Zamual liam hnu dawn dawn lo hian.Eng dang dawn lo rengin.
Bar ta puk puk ila, buh leh bal.
Ka puarin ka fån zawk mai awm mang e.

Tawnmang ramah tal

I tel loa hringnun hman meuh zawng,
zan khua hrui ang a sei leh dawn ngei e.
Hmanah chuan i sms chhiarin.
Zankhua ka tum tawi thin a.
Ka tan thaikawi bawngte ianga hlu ni thin e.Tunah zawng i thu di zawngte.
Chhiar nawn fo thin mah ila.
Ka tan luaithli mi nul tirtu mai an chang ta si.
I ngaia ka tahna a huh zo, thlehnem puan.
Lam ang letan beisei che lo mah ila,
zankhua lo tlai chuan mi han hre ve thin la.
I zun leng ngai kei ariang hi,
Mi han nghilh bik suh aw.
Ka tan par vul tawh lo mah la.
Tawnmang ramah tal intawng leh turin.
'Mangtha muttui' tiin ka thlah nang che.

Nang ngaih a zual

Zankhua a var leh tak dawn hi,
A zual telh telh, nang ngaih lunglen.
A hul hman lo, ka thlehnem puan.
Ka thiam tawk lo ni,
Zanmu chhing lo a,Nunhlui fan chu.
Nang zawng laikhumah min dawn lo ten,
Muangten i chhing awm si a.
Kei a riang chu nang ngaiin zankhua ka var sin.
Nang ngaih reh lai banna tur ni se.
Lungloh tui dawn mai ka nuam mang e.

Nunhlui i liampui

I tel lo chuanin maw,
Ni chhun a rei lua ka tih laiin.
Min nang zan chimawm in,
Thinlaiah a thar telh telh,hlimlaini.
Mitthlain ka fang leh, kan suli hnu zawng te, Au ruai ruai ka nuam mang e.Lam ang let leh turin.
Kir hian an mawi lo,
A liam ta si maw, nunhlui zawngte.
Ka tahkhua tisei tur reng hianin .
Nunhlui chu i liampui ve ta si.

Ka hmangaih che

Ka bo zo, kalna kawng chu,
ka tlu , tuin nge mi kaitho ang ?
Ka mittui a luang, tunge hru hul ta ang le?
Ka lungngai, hnemtu ka tawng lo.
A na em e, tun an hrethiam lo.
Ka nui ve, lenrual zingah.
A tap tho si, ka lairil.
Fam dairial em ka la chang lo.
Mahse i tan ka thi ta si.
Ka ngai em a che.
Mahse a khingbai lua.
A nguai zo, hlima nui thin kha.
A dang zo, hringnun kalsiam.
Lung ka chhir ngei,
Sawt tih ni reng awm chuang lo.
Ka au che, i chhang si lo.
Beiseina nen ka thlir che,
Bei chu a dawng tho si.
Ka inhrilh nawn fo,
ka hmangaih lo tiin.
A pha thei chuang si lo.
He ka thinlung hian.
Ka hmangaih che,
Tih mawlh mai hi. 

A liam ta

A liam leh ta, thlang lenkawlan,
Sik ni eng ri riai mai chu.
Thangvansangah siar kawp ten an leng,
Zan thlifim leng vel e.
Min ngaih tir nunhlui mual liam hnu.Mitthlaan cham thar leh e.
Hmanah chuan nghakhlel takin
Ka lo hmuak thin e,
Kan rûn sang i lo lawi hun.
Khar tung ka thlir ka thlir thin.
Tunah zawng lengdang rún i mawi ta si.
Lengdangten kan rún rawn mawi ve mah se,
A kim mawlh lo, i tel lo chuan.
Beisei takin ka thlir che.
Khartung sawn tih ni reng awm lo,
Zan tlaiah nang ngai hian
Luaithli ka nul leh mai thin.

Beiseina beidawng

A her chhuak leh dawn ta.
Kumsul veia kan lo nghah,
Lal pian hun lawmawm chu.
Leng zawng ten an ur,
Silh leh fen thar nen.An buai ngei. Lal piang lawm turin.
Kei ka thinlaiah thil dang cham lo i.
Di ngaiin ka rum ka rum e.
A di duh lai chang tawh lo mah ila.
Nghakhlelin ka beisei,
'mas chibai'tih te pawh.
Ka melh leh thin, ka phone ve tê hi.
A reh ngawih ngawih,
A thleng thei lo sms.
Beiseina beidawng mai lo ni e.

Hun lawmawmah

Hun lawmawm lo thlengah hian
Vangkhua han hawi vel ila,
Leng zawngte kawplai di nen tual an leng,
Kei zawng riakmaw iangin ka vai e.
Mahten laikhum thlehnem ka bel.Ka fang leh kan sul i hnu zawngte.
Thinlai a thar, suihlung a leng mang e.
Ka di lenna tlang ka thlir ka thlir e.
He krismas lawmawm hi,
Engtin hmang ve ang maw?
Mi ngai ve hian a mawi mawlh si lo.
A pawi ber mai, tuanna tlang dang.

Kumhlui

A liam dawn ta e, kumhlui ngaihawm chu.
Kan hlim, kan lawm lai ni te,
lungngaih leh tah chang ni pawh.
Khawiah tak va tuan ang maw?
Hriat reng ka duh te lairilah cham reng se.
Nghilh ka duh ngawih ngawihte liampui se.
Kumthar lawmawm takin hlimin ka lawm ngei ang

Kumthar lawmawm

Damten kan thleng leh ta,
kumthar hun lawmwm chu.
Kumhlui chu engpawh lo ni se.!
Sawt lo ngaia kun reng loin
Lungngaih ni leh tah ni zawng.Nunhlui chhuikir tlak rual loh nen.
Thlang lenkawl tlai tla iangin,
I lairil ata bo se.
Hlim lai ni leh lawm lai ni zawng te.
Kumthar ni lawmawmin her chhuahpui leh se.
Hriatrengna duhawm tak nen hlimin hmang la,
Tuktin par iangin i rilru lo thar leh se.
Khuanuin damten hual him zel che rawh se.

Rairah riang

Tuiril mai ka nih lai ata tawh,
Ka chunnu leh zuapa lu ka ti hai lua.
Khuavel eng hmu ve ngai lo turin.
Ka zuapa'n a neih sum a phal tam ngei,
A thiam tawkin anka a hlan, ka chunnu.

Chúnnu lairil a na vawng vawng,
Chhunni leh zan hlim lai rêng nei lo i;
A zuam mawlh lo, a cho lul lo.
Kei a riang puan ang hnawl chu,
Chhingmittui a súr bång lo, chùnnu biangah. 

Vul zel rawh

I thinlung hmu thei ni ila,
I lairilah ka cham si loh chuan,
Ka tan tahna mai a ni dawn lo em ni?
I thinlung bumtu hmuh ai chuan.
Ka lam hawia i nuih seih te kha.Ka tan a hluin a mawi zawk si.
Par vul zel la,
I thinlung chu eng pawh ni se.
I sakhmelmawi ti chul tur chuan.
Eng bawihahmah tang suh la,
He hringnun zinkawng buai takah hian.
Beiseina eng chuan hruai zel chein,
Ka tan kumtluang par chang nang che

Malsawm ruah

Eng ti zai zia nge.?
Ka chung vankhua chu,
A hnîmin sur reng e.
Bån réng a tum lo em ni le?
Lo ram nei tan zawng.Thal va ek char zawng bo e.
Thlawh hlo tan maltinsawmtu a va ni rua em!
Mahse maw kei ka tan,
Tha zawng khur zo e.
Sawi ka bang thei lo,
Khawvawt mawlh mai hi.
A inrem mawlh lo, sik khawvawt nen.
Nikira'n tla se, malsawm ruah.
Ngawiin Ka tuar dai thei mahna.

I tel lo chuan

Nang ngai reng reng hian,
Chhunni ka hmang liam a.
Nitin mai hian ka ngaih che a zual a.
I tel lo chuan ka nun hi, nun chanve mai a ni.
Nunhluite chuan min la cham chilh ta reng a.Luaithli nul a tul leh thin.
Ka suangtuahnate chuan min tihlim thin mahse,
Ka han meng a, ka hmu si lo che.
Hmangaih biahthu min hlan lai zawng,
Nghilh zai ka rel thei lo.
I anka nem zawngte.
Ka thinlung chuan hre reng mah se,
Ka bengah hriat tur a awm si lo.

Ka hmangaih em che a ni

Lenrual zingah nui ve thin mah ila,
ka tahna ah ka chau zo ta a .
A keh zo ta, he thinlung hi,
Ka tan tahna mai zawng i ni teh lul mai!
Mahse maw, thazual,Nang nghilh che ka bang thei si lo.
Lenglerh chan chang mahla,
I anka dam diaia,
Min tiam rinawmna zawng kha,
A cham reng tho si,
Ka lairilah.
Thinlung nain mi kalsan mah la,
Kan hlim lai nite mitthla an a cham tho si.
Ka tan doral ni mah la,
ka haw thei chuang si lo che.
Nitinin nang vangin tap mah ila,
Nang ngaih ban zai ka rel thei chuang si lo.
Natna bak min thlen lo tih hre mah ila,
Lam ang lo let turin ka duh si che.
Engdang vang a ni lo,
Ka hmangaih êm che a ni.

Beiseina êng mawi tak chuan

Sakhmel nui thei lo hial awma mawiin,
I chhungril chu lo na mah se,
I tan he khawvel hi lo ngui ruaiin,
A parte chu lo chuai mah se,
Ka lam lo hawi la,I tan ka awm reng ang.
I lairil duhawm tak chu,
Engvanga na nge, tih hre lo mah ila,
Beidawnna chhum lo zing mup mup mah se,
Lungngaia kun mai loin
Han thlir teh!
A lo hmuak reng che asin,
Beiseina eng mawi tak chuan.

He zan khawvawt tak hnuaiah

Zan khawvawt hnuaia,
Mahten rûnin ka nghah lai chuan.
zan thli vawtin rawn såwi e, khårtung.
Ka sakruang rial ang a lo dai zo a.
Ka nghilh tak nunhlui zamual liam hnu,Lairilah a thar leh e.
Hmanah chuan zan khawvawt hnuaian,
khartung i rawn sawn nghakhlelin ka thlir a
I tang nemah muangten ka bei thin.
I hmui nem tak mai leh i kut mawi tak kha,
Ka hriatrengna ah a cham thar leh e.
Khartung chu ka han thlir a,
Rawn sawn i tum si lo.
Ka mamawh che a,
Mahse i liam ta tho si.
Thinlai tina thar leh tur hian.
Rauthla i rawn tir em ni zawk?
He zan khavawt tak hnuaiah hian

Ka lo kir leh ang

Thla tam ral hnua,
I awka damdiai hriat leh chu a nuam ngei mai.
Mi la theihnghilh bik lo a ni tiraw?
I tha maw, tia mi zawh khan.
Ka tha e, tiin ka chhang che,mahse hei erawh i hre si lo,
I liam tak ni atang khan,
ka chhungril hi a ruak ngawih ngawih a ,
Nang ngai reng reng hian,
chhunni leh zan ka hmangral thin a sin.
I kianga len leh hi,
nitina ka duhthu sam a ni thin.
Mahse tihtheih dang reng ka nei silo,
Nunhlui ngaia luaithli nul mai loh chu
Lam ang lo let rawh,
Tiin vawikhat chauh tal pawh mi ngen la zawng,
Sulhnu hnawkte thianfai tur talin.
I kiangah, i kiangah ngei,
Ka lo kir leh ang

Riahrun a vai

A thim lua hringnun.
Hmabak beiseina chu khawnge?
Darkar leh hunbiin a tan awmzia a nei hek lo.
A tibuai ve lo,
Di zun leh khawtlang lunglenin.Hringmi an tam ngei, vangkhuaan.
Khawnge a then leh rual laina ve?
Tu'n ka chi leh kuang tih an tum si lo.
Tlai khat ei tur nghei chang ni atam.
Tlai khua lo ngui se,
Riahrun tur a vai,
Kawtthleran a vak vel, riahrun a zawng,
An kawt kåia chham ang zal tal pawh,
An phal si lo maw, a mi ngur ten,
Dam chu a tan hrehawm mai mah ni se.
Thih pawh chu enge ni bik chuang ang le?
Ringtu ten an sawi fo van pialral chu.
A tan nuam hle dawn mah se.
Chu Jerusalem mawi chu,
Tu'n an hrilh ngai chuang si lo.
Ami zawnga rairah riang hluan,
Ani tan chuan a lo mawi ber e.
A riahrun ve,a hahchawlhna,
Daia thingbuk hnuai chu.

Nghilh bik suh

Kumsul vawi tam lo veiin,
Rihdil meuh pawh lo kåm mahse,
Nang nena duh thu kan sam laini te,
I mitthla'n lo cham thar leh se,
kei ariang hi mi han hre reng la,Dinhmun sang takah dingin,
I tan then leh rual tha lo pung mah se.
Di, nang nena tlaini kan len laini kha,
Han nghilh bik lo la,
Zuapa changa i hraite i awih ni a lo thlena,
Damchhung khawsak buaina zawngten,
A lo tlakbuak che hunah pawh,
Hmatiang dawn lo a,
Nau ang kan nuih lai nite kha,
Nghilh bik lul suh aw.
Hai ang i lo tar huna,
Vanglainun ngaia i tah ni chuan.
Hei chauh ka ngen a che.
Nangmah hmangaih tawp ngai lotu hi,
Vawikhat tal mi han hre chhuak leh ang che aw

Inthen a awm tawh lo'ng

A ri bung bung e,Van Lal fakna dar ri.
Lanu leh val rual,
A pui apang a lian a tein
An silh leh fen mawi ber nen
An pan e. Lal Biakin ropui.An mawi ngei e.
Chung Pathian faka zaiin,
An pheikhai an chawi, chawnban an vai,
Thlir nin an har ngei.
Fakna hla sak ban zai an rel lo.
Mahse hunin ro a relna hmunah hian.
Zankhua lo tlai,tian zai rel a ngai si.
Aw ka nghakhlel, hun awm tawh lohna,
Lungduh then takte nen,
Chatuana Lal faka zai hun tur chu.
Ui chung zela inthen a awm tawh lawng

Zuapa va ni suh

Vawiin ka laitual leng chu, 

kum tam ral hnuin ka lawi lut e. 

Ka zuapa rûnin sanga'n. 

Mahse maw ka tawng lo, 

'Chemte i dam maw' tih talpawh. 

Lairil a na ngei mai. 

Hmanah mi hai, ka zuapa'n. 

Ami hraileng emaw tiin mi pel. 

Unau hmel hai ni se ka hrethiam tur, 

Ka chung thangvan ka thlir, 

Chung tûrni thangvan akal lai a ni a sin mawle. 

I lam hawiin ban a phar asin

I lairil chu lo nain,
I thinlung chu lo kehchhe zo tawh mahse,
Mahtea awm nuam ti zawkin,
Lenrualten hnem thei lo che sela.
'Dam chhan reng ka nei lo ve' i ti pawh a ni thei.Sual kawngzawh duh hial khawpa mawiin,
I nunkawng rahbi a lo tleu a ni thei e.
Mahse han hawi teh, chung thangvan,
Chung Pathian chuan a lo nghak reng che a,
Hringnun bul i tan that leh nan
I natna zawng zawng ti dam turin,
I lam hawiin ban a phar a sin.

Lang lo lama nun

Lenrual zinga'n nui ve thin mah se,
A lairil chu tapin a rum a,
Thinlung paukhauh tak angin lang mah se,A chhungril chu a no si,
A sakruangte chu him pialin lang mah se,
A zûnzam zawngte chuan hliam an tuar a.
Hmangaihtu ngåi ngai lovin lang mah se.
A thinlung chuan hmangaihtu a au ruai si.
Mahnia tlei thei hialin lang mahse,
A lungruk chu a khawhar ngawih ngawih a..
Tu dangmah ngai lo angin lang mah se,
A mamawh a ni, a lungngaihna hnemtu tur.
Dawtin a nung a,
A thinlung a bum thei chuang si lo.
He hringnun rahbî hi lo rap tleu pawh ni se,
Tun an dem thei long e.
A na êm a ni.
Lang lo lama a nun hahthlak tak chu.

Ka hua che

I tan chauh tia min tiam chung sia,

Lengdang min chhai san avang khan,

Ka haw ngawih ngawih che a.

Ka nat pawh hlau lo a,

Mahni inthiam chawp chunga, 

Dawt thu min hrilh thin avang khan,

Ka haw ngawih ngawih che a.