Tu'n an hre lo

Leng zawng muangten zanmu an chhin lai chuan,
Vawi tam hai ang thang harhin,
Ka chhingmittui far chu ka hru thin a,
Mahse tu'n min hriatpui vein ka ring lo.

I lairil nun chu mi zawng hian hrethiam se i ti tiraw,
Mahse hre vek tur chuan i duh hian ka ring lo.
Keipawh ka nun ruak tak hi lungngaiin a rum a sin,
Mahse tu'n min hriatpui ve hian ka ring lo.

Tu'n an dawn lo, ka chan nun riangvai hi.
An hre lo,zan thima ka nun dante chu.
Ka kalna thin kawng chu ka hloh ta si a.
Mahse tu'n min hriatpui ve hian ka ring lo.

Naktuk khua a lo var chuanin e,
Vawiin, nimin a chang ta mai ang khan,
Khawvel chu a kal ngaiin a kal reng mahna.
Mahse ka neih zawng ka hloh zo tih tunge hria ang le.

Ka chhungril nun ruak leh mangang chu.
Tun an hre ve si lo, kei chauh lo chuan.
15.1.2013

Uaia chul chu

A parmawi lai bera chul zo ta kha,
A nunna thihna tur a chang ta maw,
Vul leh ngai lo tura uai hnu ngei kha,
Engtikah tak parmawi chhuah leh ang maw!

A kang zo tuihna, chawm nungtu ngei kha,
Par mawi thin kha uaiin a chul zo ta.
Lengte zawng tana rimtui ni thin kha, 
Virthli lengin a lo chhem tril zo ta.

Thawnthu mai lo a chang ta,parmawi kha.
A mawina zawng kha a thamral zo ta.
A par rimtui boruaka tham thin kha,
Suangtuahna ramah chauh hmun a chang ta.

Hmangaihtu der vanga thinlung hliam chu..
Vul leh ngai tawh lo tura chul zo chu.
13.1.2013

Kei mi ngaiin a kur mahna

Zantiang lunglen tizual tura'n,
Chhawrthla leh si ar an eng riai a,
Ka chung thangvan zauvah khian,
A tham vel nunhlui zunzam kha.

Nunhlui hlimlaini zawngte kha,
Chhemdam thlifimin damten len zel se.
Hmana ka di runah ngei khan.
Kei mi ngaiin a kur ve mahna le.
24.11.2012

Fur lunglen

Khua a dul ruih a, ruah mal a tla seng seng a, reiek tlang inkham phei ruih mai chu chhumin a bawh chuk a, boruak a dai nuam em em a, han hawi vel ila, thing hnahte chu an hring thar surh a,kawngpuia sarang var thet thut te pawh tuihawkin a len fai a, kawngpui dung pawh a lang fai ve kuar a, kawngkama thingpui dawr inhawng tlar thep thup vaivutin a bawh pawt chhek chhukte chu a lang fai ve kuar a.

Ruah mal tla ser ser karah chuan mipa naupang rual chu an in atang chuan an rawn tlanchhuak sap sap a, an inko leng lung a, luikawrah tuihawk tling zawngin an inzui dam dam a.

Luikawr chu zawh zelin tui tlin tam deuhna chu an zawng zel a. A tawp atawpah chuan vengmawng lama Pi sangi te kawmthlangah chuan a lo li deuh lung a, damlohna in a ngam ve loh ni awm takin chung mipa naupang rual chuan vengchhak atanga tuihawk rawn luang chu an lo khuap zel a., khuap ngah tawk nia an inhriat chuan an zinga an boss ber ni awm tak, thau lenglung, lian ve ber chuan an dive lut ta a.

An zinga lian ber chu a han dive lut pawrh a, tui eng phet phawt chu a rawn perh chhuai a, naupang dang ho pawh chu zuanluh tumin an inphelh sap sap a. A lut hmasa ber Ricky chuan tui chhung atang chuan a luh dan indawt turin ro a rel zuah zuah a. A huai dan indawt chuan an han inluh chhawk a, nuam an tingei mai. An zinga te deuh leh a dawi fal ho chu a sirah chen ve chak tak hian an thlir dauh dauh a, 

Zan khawhar

Zan a rei telh telh a, khawlaia mihring thawm ri pawh hriat tur a awm ta lo. Ri leng vak a zawi tial tial a, kawngpui dunga motor rawn tlan leh zauh thawm lo chu thawm dang reng reng a awm lo. Perhpawng leh khuangchiri ten an aw an chhuahna hun, zan tlai tawh tak, thawm ri zawng zawng a reh thinna hunah chuan ri si lovin thawm ring tak a chhuah tlat si thin a nih hi.

Thawm nei si lo, ring taka ri thin chuan ka beng mai pawh ni lovin, ka thinlung zawng zawng fanchhuakin ka ngaihtuahna, suangtuahna leh mitthla thlengin a khawrhfai leu a. Tui taka i mut lai khan e, kei erawh, chu thawm chuan zanmu mi chhin tir thei lo fo sin.

Enteh, zanin ngeiah pawh thawm a rawn chhuah leh ta a nih hi. A ri hriat tur awm lo mah se, ring takin a au a. Kan nunhlui zawng zawngte kha hmaih palh awm hauh lovin min hrilh nawn leh a. Nunhlui leh kan sulhnu, hmunhlui chang ta maite kha min fanpui leh a sin. Duhtak, ka ngai takzet che a ni.

No khat chu

A hmangaih a liam tak atang khan,
Hlimlainite pawn kianzai an rel ta.
Mahte'n a han fang sulhnu hmunhlui zawng kha,
A tlang leh mual zawng a la dang chuang si lo.
Tu dang ngai lova lenlaini zawngte,
Duattea buan ang pawm lai kha,
A tahkhua tiseitu mai lo niin,
Natna thlentu mai an chang zo ta si.

"Khawnge nghilh zai ka rel mahna" tiin,
Daikil kawm zawng a hrut,
Siang a lawi e, chawlhtui ningzu runah,
Tahchuan rei lote tal pawh,
A thinlung chhungril hliamtu ngei,
Hmangaihi kha a nghilh mahna le,
Nunhlui zawng nghilh tum khan,
A han dawm no khat chu.

Chu siktui ianga fim khåkna pai si chuan,
A lairil zawng rawn fan si e.
Hmangaih sakhmelmawi leh anka damdiai kha,
Mitthlaa'n a lo cham thar leh a,
Tiamthu zawngte thinlaia'n lo thar lehin,
Chhingmittui a luang, a bianga'n,
Nunhlui zawng nghilh tum khan,
A han dåwn leh no khat chu.

Leh

"A thupui teh tawp chu a va ho ve le" pawh lo ti la, ka dem lem lo che. Ni e,'LEH' han tih tawp mai chu a ho lu lam deuh chu a ni. Beng sik meuha ka han ngaihtuang vang vang pawhin hei aia mawihnai zawk han phuah tur ka hre thlawt lo a ni. Ngaihnathiamna nen min chhiar sak ve poh a niang chu.

A tirin Pathianin Lei leh van a siam a, chutiangin chhun leh zan, mipa leh hmeichhia...a zavaiin a inkawp vek zel mai nia mawle. Han ngaihtuah neuh neuh chuan thil mahni chauha awm a lo awm reng reng lo zuk ni a. He khawvela thil awm reng rengte hi amah mai chuan a lo kim thei meuh lova, a tu ate pawh, thil nung leh nung lo thleng hian kawppui an lo nei theuh mai a, entirna atan thil nung loah pawh dawhkan pawhin kawppui atan thutthleng a nei a, thil dang dang pawh han chhut neuh neuh chuan akarah LEH a lo awm zel mai. Kan Pathian ngei pawh Hmangaihna Pathian a nih rualin Phuba lak hmang Pathian a ni leh zel a. A pakhat chauh hriat chuan nun hi a hril thui lo teh a sin aw!

He hringnun kawng chhuk chho tak kan zawh mek lai pawh hian, thil chihnih zelin min lo hmuak a, hlimna leh lungngaihna, tah leh nuih, rethei leh hausate pawh, vanduaina leh vanneihna,chhia leh tha thleng pawhin, a pahniha kan hriat loh chuan a han buaithlak dan tur chu, thatna hi hmu ve ngai lovin, a chhia hlir chauh hmu thei ta ni ila, kan damchhung chu ner nuau chungin kan hmang ral anga, mi vanduai berte zinga mi kan ni hial awm e. Vanduaina leh harsatnate kan chunga, a lo thlen changte hian, kan hma lam hunah vanneihna kan la tawng ve mial mahna tiin, mitin hi kan la nung ve hram hram zawng a nih hi.

Vanram

"Aw a va nuam em
Kan run chhung,
Lalpa chenna...... vanram a chang thin."
tih hla ka phone ami zai chu mut pahin ka ngaithla a, a hla thu chuan min vel a, ka mittui luangthla hi ka dang zo mawlh lo, Lalpa nang ka ngaih che a va zual tak em.Lalpa he khawvela vanram ka lo beisei ve thin, chhungkaw hlim tak chu ka tan chuan mumang ang mai chauh an ni si a. Mite chuan he khawvelah pawh vanram an tem lawk thin a, an chhungkuaah nang i lal ber a tin ni., kan runah erawh i tan hmun a tlem lua e. Sual chuan hmun zawng zawng a awh zo si a. Ni e, Lalpa i chenna chhungkua chu a nuam a, fate pawhin nu leh pa bulah awm an chakin inchhung pawh an thlahlel thin. Nu leh pa tan fate thlakhlelhna bak thil hlu dang a awm chuang hek lo. Kristian chhungkua chuan nitin i ram nuam chu a tem lawk si a.

Anih keini chhungkua ve thung hi e, Lalpa kan dam kim ve si lo, khawvel sualna chuan min chimpil mek a, pa berin zu a in a, naupang tan pawh thlamuang taka awm nan kan in riangvai tak chu a tlak ve si lo, in ai chuan khawlai nuam an ti zawk asin.. Chhung inkhawmte chu khawilam, chaw pawh kan eirual mang ngai lo zawk si a. Kan hmaa inchhawp chu hremhmun a ni ringawt, chhungkua a tlaran a, retheih lah a zual sawt bawk si, mite hmuhsit leh ngaihnep kan hlawh a,kan tan chuan mi zinga awm pawh a nuam ta lo. Chu chuan sual avanga thlei bik awm lohna ram, rethei leh hausa ang khata kan lenna hmun tur Lalpa i ram chu mi va ngaih zual tir em! I ram ngaiin ka tah hial tak hi.

Mangtha aw

Inrinni zan a ni a. Ruah sur cherh cherh chuan boruak chu a tivawt deuh sung a. Zan dang ang lo takin vengthlang Biakin lamah lengkhawm zai ri hriat tur a awm lo, ruah sur vangte pawh a ni ta ve ang. Zan danga min ti muhil thei lotu khuang ri inrawn tluk tluk thawm hriat tur awm ta lo chu a thawventhlak rual rualin khua ati har ang lawi a. 

Ruah chu a han deuh dawn tiin a han reh deuh duk a .Zan danga duh tawka che thin khuangchiri leh perhpawngte pawh khaw chhe hnuaiah chuan an zai peih bik lo a ni teh chek a niang chu. An thehhmeh reh tlawk tlawk mai a ni. Bang laia sana khai inchek ri tlek tlek pawh a ring duh ta ngei mai.

Kei muhil thei lo ta pek chu khumlaizawlah mahni in ka let ka let a. Ka lukham hnuaia ka dah thlalak chu ka han la chhuak a. Ka han enkual a, a tawp ber thlalak pakhat karah chuan i thlalak min pek ngei kha a lo la inzep trat a. A hnung lamah chuan pentui pawlin " 4ever ma luv, dt.16.6.2007" tih hi a inziak kiau mai a. Chu thlalakah chuan Hun liam tawh hnu zawng zawng a chuang vek emaw tih mai turin engkim chu ka hmaah a rawn inlan zut zut a. Engkim kha a ngai ang ngei khan. Enteh duhtak, ka mittui ka dang zo lo leh ta.

Retheih tak hi chu aw-2

Mumang inzawm lo leh mak pui pui man lai takin nute'n tho rawh an han tia, tau bur chungin kan han tho a, zan hmasa lama chawhmeh tui loh em avanga chaw ei peih loh chu zing lamah hna rawn thawk tranin pum a ri ruk ruk a, thingpui chu a awm mai a, a hmeh tur awm hek lo le. Chini nen thingpui sen tak khei khui chu tram hnemah kan tlak ve bawrh zel tho mai,

Chhungpuinu ber a tho hma bawk a, chaw lo chhum fel der tawhin dal a lo kang so bawrh bawrh a, siam tur dang zawngin chawhmeh dahna bel han en ila, sa te chu khawi lamah, chawhmeh dang siam belh tur a awm tawh chuang reng reng lo. Phun nung nung chungin eng eng emaw phuah khawmin a hmingin chawhmeh chi hnih chi thum chu kan siam chhuak ve mai bawk a,

Nute ni khat hlawh chanve dawrh pawh tel 1 ltr khat man lek a lei theih laiin, eng pawl pawlin emaw pawisa an la rawn khawn thul, inhlawhfaa eizawng nikhatah rs 200 chauh la lut thin tan chuan, rs 10 lek thehchhuah pawh a har teh viau a sin, chuta karah tuk khatah vawi 3,4te an la rawn khawn zui, lung a zing teh e . 

Hlim zai ka rel ta'ng e

Nang vanga tapa rum thinin,
He ka sakruang pawh hi lo chau zo mah se.
I nunzia, anka der mai kha,
Lairil chuan dem thin che mah ila,
Hringnun hlimte'n i hman chuan.
Hlimzai ka rel ve mai tang e.

Nang nena kan tiamthu zawng suta,
Kir leh ngai tawh lo tura i liam ni khan,
Hliam tam tak mi hnutchhiah mahla,
ka natnate chu eng ang pawhin lo thuk se.
Hringnun hlimte'n i hman chuan.
Hlimzai ka rel ve mai tang e.

Ka koh che pawhin chhan zai mi rel lovin ,
I thinlung ata mi paihchhuak tawh mahla,
Nunhlui hlimawm tak mi la hnutchhiah tal alawm.
Hriatrengna duhawm loh kha nghilhzai relin,
Hringnun hlimte'n i hman chuan.
Hlimzai ka rel ve mai tang e.
16.9.2012

Chawhchawrawi

Chawhchawrawi run sang ka kai a.
Thu tin mawi leh hla in min lo awi e.
Lungril ruak khawhar tan hian.
A hnem ngei emaw lunglen.

Tihian ka dawn hringnun pawh hi.
Chawhchawrawi iang ka nun lo ni.
Thatna sawi tur nei si lo hian.
Lengte lawma'n lem ka chan chang tam thin e.
29.11.2012

I tel lo hringnun

I tel loa hringnun hman meuh zawng,
zan khua hrui ang a sei leh dawn ngei e.
Hmanah chuan i sms chhiarin.
Zankhua ka tum tawi thin a.
Ka tan thaikawi bawgte ianga hlu ni thin e.
Tunah zawng i thu di zawngte.
Chhiar nawn fo thin mah ila.
Ka tan luaithli mi nul tirtu mai an chang ta si.
I ngaia ka tahna a huh zo, thlehnem puan.
Lam ang letan beisei che lo mah ila,
zankhua lo tlai chuan mi han hre ve thin la.
I zun leng ngai kei ariang hi,
Mi han nghilh bik suh aw.
Ka tan par vul tawh lo mah la.
Tawnmang ramah tal intawng leh turin.
'Mangtha muttui' tiin ka thlah nang che.
13.12.2011

Ka hmangaih che

Ka bo zo, kalna kawng chu, 
ka tlu , tuin nge mi kaitho ang ? 
Ka mittui a luang, tunge hru hul ta ang le? 
Ka lungngai, hnemtu ka tawng lo. 
A na em e, tun an hrethiam lo. 
Ka nui ve, lenrual zingah. 
A tap tho si, ka lairil. 
Fam dairial em ka la chang lo. 
Mahse i tan ka thi ta si. 
Ka ngai em a che. 
Mahse a khingbai lua. 
A nguai zo, hlima nui thin kha. 
A dang zo, hringnun kalsiam. 
Lung ka chhir ngei, 
Sawt tih ni reng awm chuang lo. 
Ka au che, i chhang si lo. 
Beiseina nen ka thlir che, 
Bei chu a dawng tho si. 
Ka inhrilh nawn fo, 
ka hmangaih lo tiin. 
A pha thei chuang si lo. 
He ka thinlung hian. 
Ka hmangaih che, 
Tih mawlh mai hi. 
19.12.2011

Duhtak, dam takin mangtha le

Duhtak,zanin chu e, zan danga eng de sep sep thin vanzawl mawitu arsite pawh an bo duak a, i truanna mual min thlir tira nang ngaih tizualtu Thla meuh pawhin thenna thu kan sawi chu ngaingam lovin a bibo ta a nih hi.

Ka chung vansang tak chu ka thlir a, chhum dum chhah em emin a hliahkhuh tlat a. Ka bianga ka mittui far hi min trawmpui ni awm takin ruah a sur seng seng a sin. Zandanga ral lehlam tlang lang cham dur maite kha zanin chuan thimin a hliah zo si a.

Duhtak, a pawi a ni tiraw, hei bak enge ka sawi chuan ang le? Ka thinlung chuan a hlat phal lo che a, mahse he ka chhia leh tha hriatna hian nang hnaih che hi rem a ti tlat si lo a ni. I kianga awm kha e, ka ning ngai lova, ka thlahlel ngawih ngawih che a ni tih nangpawn i hriat kha.

Mahse tunah chak lo leh hreh takin thenna thu kan sawi dun ta si a. A hrehawm dan teh dawn se, hei bak enge awm chuang ang le? Mahse duhtak, kan pahnih hian engtikahmah kan leng dun thei dawn si lova, ka na ka tuar zawh loh hma ngei leh he chhia leh hriatna fim taka ka ngaihtuah theih lai hian ka tih loh chuan e, a tlai zo ta tih mai kha ka chan a ni dawn a sin.

Retheih tak hi chu aw

Thiante an awm mai mai laiin,a taima ber awm zia zangin Chhun lamah hah thi kulin mi hnuaiah kan inhlawh a, tu ten emaw thawh loh hlawh an lak trawk trawk laiin keini chuan hah takin rs 200 kan la lut ve chauh a ni a. Vawksa pawh kgah 200 a ni a, lei ve dawn chuan, a tuk chaw nghei huam meuha lei a ngai zu nia. 6 pay a han ni chhova, thil man pawhin 6 pay a kai chho ve zel a, huiha, electric bill, tui man , a man a sang chho vek, gas vang bawk nen. keini rethei tan chuan e chhum dum lian tawkin min khuh reng ang mai hi a ni.

Chu mai a ni lo. Kan ei leh in hautak zia ngaihtuaha kan thawh chhuah tlem si hian min tibuai thin. Thiam nei ve ta em em lo chu kan thawh theih tawk chu mi ban khurh laihte, hna rum tak2, vai mistiri pawn an tih duh loh chu chhungkaw tan tiin kan thawk ang lawp lawp a. Hmasawn zela hausakte chu khawi lam, kan nitin ei khawp kan hmu chhuak ringawt pawh hi kan dam loh phah trep trep a ni si a.

Khawi laiah emaw hna thawka cement chauh lauh lauh laiin high skul kan kalpui thinten min han hmu fuh a. Coat suit nena hmuh chang phei hi chuan khuk ral raih hi a chakawm thin.

Urlawk zan

Tukverh eng ve ve a va hmuh chuan a chhungte an la mu lo tih a hre mai a. Inchhung lam pan ta mai lo chuan, pawn lightin a en phak loh chin an kawt kai maia far thing upa tawh tak hnuaiah chuan a han thu leh te te a.

Chu thlasik thli vawt tak chuan a sam a dar vaw hnap maite chu rawn chhem phe hlep hlepin, a bula thing hnahte chu a chhem ri sung sung a. Vawt tiin khur mah se, a hmelah chuan an inchhung lum pan duhna hmel reng a pu lo.

Khua chu a thiang nuamin,vanlai zawla arsi phe neuh neuhte chuan van zau tak chu a timawi zual hle a, hmar lama arsi awm khawm deuh chu chhumin a bawh paw chiai a, vengchhak lama ktp chrismas hla sa rual dual dualte pawh a hriat vai uai theih a, khawthlang lama thla de tir chuan a hmel lungngai tih hriat taka ngui lep chu a rawn en rui a. 

Ka la hrilh nang che

Inrinni a ni a, naupang khawmpui a hnaih tawh avangin ka fate pawh chang zir turin Biakinah an kal vek hlawm a,keipawh hna trul ang angte ka tihzawh hnu chuan ka tihdan pangngai angin treasury lama bazar turin Bungah chuan ka chho bek bek a.

Nang nena kan lo thut dunna thin ngei mai, kan thingkung hnuaiah chuan ka han thu hahchawl leh a. Thlang lam kawna naupang chang zir thawm leh, workshopa thingzai khawl ri ruai ruaite, treasury lama motor pit thawmte chu ka ralkhat hriat ruai ruai a. Bunga thlamuang taka ka thut lai hi chuan Aizawl khawlum lutuk leh uap churh mai kalsana ngaw dai nuam em ema awm ang mai hian ka inchan thin.

Arm veng chung velah chuan mu vanlai an leng der der a,Thlifim lo thaw heuh heuhte chuan ka bul vela thing hnah leh maute chu a chhem ri seng seng a, khawlum tak kara chhemdam thli lo thaw heuh heuhte chuan nunhlui zunzam rawn kengin, chu zun chuan mi fan vel a..Hmana nang nena kan nun kha ka hmaah an rawn inlan zut zut a. Ka khawharzia min hriatchhuah tirin nutling a pumpa hi min hliam a, naupang ang maiin min trah tir thin a nih hi.

A hming tal hria ila

Ka eihmuhna ve, nitina ka thawhna thin restaurantah chuan customer kan neih em em loh avangin thutthlengah thut pahin pawnlam chu ka thlir reng a.

In chhawng sang tak tak kar atang chuan tlai ni tla tur sen phut mai chuan chanmari Biakin chu a chhun eng phut a. A tilang ropui ngei mai. Khawlaiahte chuan mi chitin chitang an vei suau suau a. Mahse chung thilte chuan ka rilru an la lo a. Motor nalh tak takte chu ka awt hek lo.

Mahse thil pakhat, ka rilru ka ngaihtuahna zawng zawng lapengtu chu ka hmu ta tlat mai. Kan dawr zawnah chuan a bike chu a rawn park a, kan dawr chhungah chuan ngawi renga rawn lutin dawhkan kil lamah chuan a thu a. A tha takzet a ni. Ka tehkhin thiam dan ber chu thawnthubu vela a changtupa ang mai hi a ni. Khawi atanga lo kal nge, enge a tih thin tih lam ka ngaihtuah pha lo. Mahse Phu loh leh melh pawh ka melh ngam loh tur ni mah se, a hming ka hriat ve tal chu ka phu ve a ni.

Eng ka ti ta emaw ni, enge a ei duh dawn tia ka zawh laite chuan ka lai a, ka zak a, ka tiril hi a khur ni berin ka hria, a hmel atang leh a thawmhnaw engkim atang chuan mi hausa chhungkua atanga lo seilian a ni tih ka hai lul lo. Mahse hei erawh ka hria,kei restauranta inhlawhfa ve mai mai, sakhmel chhuan tur pawh nei lotan hian rem ve ngai dawn lo mah se, A hming tê chauh ka hriat chu a pawi em em dawn ami le?

Ka hrethiam lo

Ka thinrim changin chhan awm lovin thinrim suh i ti a.
I bula thu ka sawiin,
Thu ho lutuk ka ngaithla peih lo i ti a,
Ka tihtauh ve lahin,
Naupang chhia takin awm suh i ti a.
Message min thawn khat lutuk ka tihin,
Message type hmanin ka khawsa lo i ti a.
Khawiah emaw kalpui tura ka sawm chein,
Mi hmuha inzui a zahthlak i ti a. 
Min duh tak tak em tia ka zawh chein,
Ka hmangaih che i ti leh ang lawi a.
Ngaihzawng dang i nei an ti che tia ka hrilh che in,
Mi thusawiah innghat suh i ti a.
I beisei ka pha lo min ngaidam rawh i ti chamchi a.
Ka beisei dana awm pawh i tum chuang hlei lova.
Min ring la, i ngaih ti tha lo duh suh i ti a.
Rin ngamin i awm chuang si lo.
Inthen mai ang ka tih lahin,
Inthen chu i duh loh berte zing ami a nih i sawi leh lawi bawk si.
Heng zawng zawng ka ngaihtuah hian,
Eng rilru nge i put ka la hrethiam ta chuang lo.
29.11.2012

Ka lung a leng

K-a dawn chulhnu nunhlui liam hnu,

A la cham vein ka ring, a saw rala'n,

L-ungrualtea nau ang nuih laini zawng.

U-aia chul maia'n ka phal lul lo.,

NG-aiin ka au hlimlaini zawngte.

A truanna hria ni ila nunhlui zawng kha. 

L-am ang letan ka sawm ngei ang.

E-ng dawn lovin tual chai za leh ila.

NG-aih lai ka bang mahna nunhlui liam hnu

29.11.2012

Ka awm angin

Zan dar 8 vel a ni tawh ngei ang,khawchhunga bus service pawh a awm tawh lo. Hrangbana college kawtah chuan tleirawl kum 20 mi vel hi nghah nei ni awm takin a ding a. Motor engin a hmel a rawn chhun thin chu hliah tum ni awm takin a sam chu hma lamah a uai thlak tir hnuang a. A hmel tlem te lo lang thin chuan a hmelchhe vak loh tih chu a hriat theih mai a. A incheina pawh chu a nalhin a pianin a zir bawk a, a inhmeh ngei mai. A kuta a hum reng, a phone chu a han en leh thin a. Eng tak nghak ni maw?

Chutih lai chuan chanmari Biakin lamah chuan crusade an nei emaw ni, an zai thawm leh khuang inrawn tlut tlut thawmte chu a hriat theih a. Zai a nawm hmelin an hallelui ri pawh a ring ngei mai. 

Chu tleirawl pawh chu a dinna sawnin Biakin hnuai lam chu a thim zawk avangin a phei a. Chutia mahni chauha a din lai chuan Ph call a lo kal a, Ph atang aw a hriat chuan dar 9 velah a rawn thlen hman dawn chauh thu a rawn sawi a. A la nghah fan fan chu a ngai dawn a ni.

Just another love song

Chu thlasik khua chu vawt hle mah se, hei bak hun ropui leh lawmawm a awm chuang lo ti ni awm fahranin Biakin chu a khat hmur a, pitar leh putar pawh an bang chuang lo,nakum lamah chuan kan hmang thei tawh lo ang a, "tun trum chu aw" an ti a ni ngei ang, shawl lum tak nen intuam hlunin an thu ve khar lawm a, naupangte pawh an thawmhnaw thar nen phur takin lam tualah lamin, gallery lamah lah tleirawl ho lungkham nei lo zetin an lo phun ri ser ser bawk a. 

Thusawitu chu a lo ding a, thiam taka thu a sawi laite chuan nu ho chuan Amen an lo pe tuarh tuarh hlawm a, Chung inkhawm zinga nula thutna tlar hnung lam pangah nula pakhat hmel fel rin ren chuan thusawitu thusawi chu ngaihnawm ti hmel tak hian mit khap lek loin a thlir dauh dauh a, a mittui lo hnam triam triam chu a hru leh zauh thin a,mahse thusawitu thu sawi vang a ni hauh si lo,a ngaihtuahna chu hmundang daihah a vak kual velin, chu chuan a mittui a ko chhuak zawk a ni.

Inkhawm ban a lo ni a, pawn boruak chu a thiang nuamin van chu a thiang kak a, thla eng no em em chuan reiek tlang inkham phei ruah mai chu chhun paw ruihin,vanzawla arsi phe tuarte chu chhumina bawh paw chiai a, Biakin chei eng de sep septe leh krismas tree te chu naupang mai pawh ni lo, tu tan pawh mit a la em em vek a ni.

Chhawrthla thangvan a kai ni chuan

A sakruang kan run sang kai tawh lovin,.
Lengdang tang belin liam tawh mah se,
Chhawrthla thangvan a kai ni chuan.
Chhingmit zawng a leng hmun mah na.

Annem biahthu kan hlan zawngte kha.
Nunhlui tham ral chang tawh mah se.
Chhawrthla thangvan a kai ni chuan.
Chhìngmitthla in biahthu mi hlan ve mah na.

Kan truanna vangkhua hmun mah se.
Kan kar erawh zamual tam in a dang ta si.
Chhawrthla thangvan a kai ni chuan.
Nunhlui kha dawn kirin a trangah ka bei leh mahna.
1.12.2012

Lo kir tawh ta che

Hmanah duhten i tangah min pawmin,
Tihian annem biahthu mi hlan kha.
Min hnema'n ka kiangah nang awm reng la,
Engpawh thleng se rinawmin aw tiin.

Ka hmangaih che tia biahthu mi hlan lai khan.
Ka lung lawm khan rin har ka va ti em!
Tihian min hrilh a ni lovem ni?
Ka hmangaihna che chu hunin a la hril ang chu tiin.

Hun leh nite chu vawi tam an ral ta.
Mahse maw hunin hril tik ni reng nei love.
Min hmangaih zia hril tur hian,
Lengdang tang i belh a ngai ta zawk em lo ni?

Hmanah kumtluangin tia kan tiam zawng kha.
Romei iangin a thamral zo ta.
Biahthu min hlan zawng kha la kir lehin.
ThaLengi tan i hlan zo ta si a.

I tel lova hlimtea laitual len zawng,
A har ka ti em mai valmawi.
A rei lua e lengdang tang i belh chhung.
Lam ang letin lo kir tawh ta che.
4.12.2012

Krismas thilpek

Krismas thlen nan kar khat chiah a awm tawh tihah chuan ka fanu kum 4 mi, cherry nen chuan apa lo haw hmuah pahin kan verandaah chuan sikri aiin kan thu dun rial a.

Zan boruak chu a thiang nuamin vante chu a thiang mawi em em a. Current kan neih loh avangin arsi te chu an lang chiangin, thli thaw heuh heuhte, boruak vawt vur maite chuan Krismas rim a nam tir rum rum thei hial a ni.

Cherry nen chuan arsi te chu kawk kual pahin a hmingte kan phuah dun a. Mahni fate bulah chuan kan naupang tha leh hi a ni ringawt zel a nih hi. Chhak lama arsi eng bik em em mai, Chawngmawii tia an vuah chu boihtei chuan nalh a tive ngang a ni ang. "anu khi khi cherry ti ang aw. Keima ta tur" a ti a. Kan tleirawl ve deuh laia kan thian hova arsi kan inchuh thnte kha min tihre chhuak zawk mai.

A pa lo haw har nen, current awm lo bawk nen, apa nghah pah chuan thawnthute kan sawi a. Isua lo pian dan, berampute leh khawchhak mifingte chu arsi in Isua pianna ranin thleng a hruai thute, mifingte chuan an neih hlu ber ber an pek thu te chu ka hrilh melh melh lai chuan Bawihi chu ka han en a, a mutchhuah a hun tawh teh lul nen ngaihnawm ti tak hian a ngaithla reuh a. I mut a chhuak tawh em tia ka zawh chuan mutchhuak hmel pawh a pu lo.

Nibiru

Vawiin hi 12.12.12 a lo ni reng mai. Ka hmaah chuan lehkha zir tur ka inchhawp nuai a. Khaw awm danin a zir lo bawk a. A zir kan ti zawk dawn nge ni. Rizaia inkhuh hlun chung chuan ka han fb a. status leh group hrang hrangah chuan Nibiru chungchang a lo lang chuai chuai a. A then uangthuang takin, a then thu tak deuhte pawn. Kei tapek pawh chuan hmana an sawi vul chuk NIBIRU kha vawiin a ni tih ka han hrechhuak leh hnuhnaw a.

Eng eng emaw ngaihtuaha in statuste chhiar paha ka like lai chuan thianpa Mr. Fair (Zela) chuan ka rilrua ka lo ngaihtuah neuh neuh chu thiam takin, rilru dek zar hian status ngaihnawm tak a rawn update a. A thuziah ngaihtuah rauh rauh pah in Pathian lo kal hunah kei hi mi hruai tel ve lo anga tia ngawi renga ka thut lai chuan tlangau hi a rawn au ve ta tak tak a. A thuah ka cheng deuh a niang, min tiphu zawk thei hial mai. Ngun deuha ngaiththlain Mibo a rawn puang dawn emaw ni le, ka ti hman thelh a. Mahse vanneih thlak takin chu thu chu ka hre lo hlauh. Thenawmte thawm pawh kan ngaichang a. An la kim hmel hle mai.

Derthiam val

Hmanah vawi tam min dil a ni lawm ni?
Ka kut vuana hringnun zawh dun turin,
Tihian mi ngen nawn fo a ni lawm ni,
Lungruk hmangaihna chu hlan ve tur chein.

Hun lo her zelin kum sul a vei a,
Ka hlan che ka neih chhun ka thinlung chu.
Dawhtheihna nen ka dawm fo thin che a,
A har zo ta i tel lova nun chu.

Mahse hei erawh ka hre har lua e,
A rukin leng dang i lo chhai thin maw .
I nunzia zaleng zawngte fak fo kha,
Partin lawr thiam val i lo ni si maw .

I nunze mawi tak kha maw dawt lo ni.
Lairil tel lo tahna mai maw lo ni.
16.12.2012