Thursday 10 January 2013

Nibiru

Vawiin hi 12.12.12 a lo ni reng mai. Ka hmaah chuan lehkha zir tur ka inchhawp nuai a. Khaw awm danin a zir lo bawk a. A zir kan ti zawk dawn nge ni. Rizaia inkhuh hlun chung chuan ka han fb a. status leh group hrang hrangah chuan Nibiru chungchang a lo lang chuai chuai a. A then uangthuang takin, a then thu tak deuhte pawn. Kei tapek pawh chuan hmana an sawi vul chuk NIBIRU kha vawiin a ni tih ka han hrechhuak leh hnuhnaw a.

Eng eng emaw ngaihtuaha in statuste chhiar paha ka like lai chuan thianpa Mr. Fair (Zela) chuan ka rilrua ka lo ngaihtuah neuh neuh chu thiam takin, rilru dek zar hian status ngaihnawm tak a rawn update a. A thuziah ngaihtuah rauh rauh pah in Pathian lo kal hunah kei hi mi hruai tel ve lo anga tia ngawi renga ka thut lai chuan tlangau hi a rawn au ve ta tak tak a. A thuah ka cheng deuh a niang, min tiphu zawk thei hial mai. Ngun deuha ngaiththlain Mibo a rawn puang dawn emaw ni le, ka ti hman thelh a. Mahse vanneih thlak takin chu thu chu ka hre lo hlauh. Thenawmte thawm pawh kan ngaichang a. An la kim hmel hle mai.


Tihian ka ngaihtuah chhunzawm ta mai mai a. Engtikah emaw chuan Pathian hi a mi thianghlimte lawr turin a lo kal leh ngei awm si a. Chutih hun chuan hun hi a kal ngaiin a kal reng anga. Facebookte pawh hi la awm ngeiin ka ring , thenkhatin status kan update mawlh mawlh anga, lungleng tak tak te leh fiamthu titaka rawn update te. Pathian thu tha tak tak te pawh kan la update mahna,kei ngei pawh hian ka update ve mai thei. .

Special report lamah chuan, Kan venga mi chu mi chu a bo tih hi an lo post ang a, a commentna ah te chuan keini pawh a bo alawm tiin an rawn sawi sup sup ngeiin ka ring. Thenkhat mahni khum la chhuahsan hauh lote chuan pawn lama thil thleng hre miah lo hian fiamthu takin an rawn comment ve leh ngei ang. Thenkhat chuan" mi thianghlim lawr a ni thei mai lo maw" tiin hlauthawng rilru takin an rawn chhunzawm ang a. Awih lo bur mite nen inhnialna pawh a chhuak ngeiin ka ring a ni.

Chu hun a lo thlen hun chuan kei leh nang hi engmah hre lo hian facebookah hlim takin kan la inkawm ang em le.
12.12.2012

No comments:

Post a Comment