No khat chu

A hmangaih a liam tak atang khan,
Hlimlainite pawn kianzai an rel ta.
Mahte'n a han fang sulhnu hmunhlui zawng kha,
A tlang leh mual zawng a la dang chuang si lo.
Tu dang ngai lova lenlaini zawngte,
Duattea buan ang pawm lai kha,
A tahkhua tiseitu mai lo niin,
Natna thlentu mai an chang zo ta si.

"Khawnge nghilh zai ka rel mahna" tiin,
Daikil kawm zawng a hrut,
Siang a lawi e, chawlhtui ningzu runah,
Tahchuan rei lote tal pawh,
A thinlung chhungril hliamtu ngei,
Hmangaihi kha a nghilh mahna le,
Nunhlui zawng nghilh tum khan,
A han dawm no khat chu.

Chu siktui ianga fim khåkna pai si chuan,
A lairil zawng rawn fan si e.
Hmangaih sakhmelmawi leh anka damdiai kha,
Mitthlaa'n a lo cham thar leh a,
Tiamthu zawngte thinlaia'n lo thar lehin,
Chhingmittui a luang, a bianga'n,
Nunhlui zawng nghilh tum khan,
A han dåwn leh no khat chu.

Ningzu chuan lairil na kha rawn kai tho e.
A aw rawl zawng chhuahin,
Anchhia a lawh,anka der hlantu ngei kha.
Sawt tih awm chuang si lo.
Ngaiin a han au, hmangaihtu,
A hlawh chhuah erawh hei hi,
Ami leng nuihsawhna te chauh chu.
A rian khua a sei thlawn mang e.

Thinlung beidawng, rûm ri chuan.
A hmangaih kha ko mah se,
Kir tik ni reng a nei tawh dawn si lo.
Ngaidamin sulhnu hnawk kha nghilh mah se.
Lam ang let zai a rel hlei lawng e.
Dam thlakhlelhna reng nei lo khan.
Hriatrengna duhawm lo tak nen ai chuan,
Thìh pawh chu hlau lovin dåwn leh ta e no khat chu.
18.2.2012