Hmangaihna chu dawn ka duh lul lo ve

Mal leh khawhar taka ka awm lai khan, 

Ka kiangah nang chu i awm ngai lova, 

I tanpuina ngaia ka koh lai che khan, 

Min hrethiam rawh ka buai em a ni i ti a, 

Ka kiangah rei lote awm ta che ka tih lai khan, 

I hman loh thuin mi chhang a, 

I hnena ka lungawi loh thu ka thlen ve chu, 

Thu ho lam mai maiah i chantir a. 

Nang tihnui ve che ka tum lahin, 

Mi laktlak loh ni hialin min chhuah a. 

Ka hriat ve trul nia ka zawh thin che chu, 

I hriat a trul lo tiin chhanna min pe a. 

I kuta vawn che ka dil che khan, 

Mite selna dawn i hlau a, 

I ruala ke pen ka tum ve lahin, 

Nang chu chak takin i kal sauh sauh a. 

Ka kut i chelh nghaka ka thut lai khan, 

Ka lam pawh hawi lovin chak takin i kal a. 

Hmun hlauhawm nia ka hriatah, 

Mahnia kal mai turin min thlah a. 

I kiangah ka lo kal ve ang chu ka tihin, 

A trul lo tiin ka sawmna che i hnawl a. 

Ka hmangaihna che tupawn hria se ka duh laiin, 

Min duhna chu i lantir ngam ngai lo va. 

Ka ngai che tia ka hrilh chein, 

Min ngaih thu erawh i awka ata a chhuak ngai lo. 

Ka tan i pawimawh ber ti chung siin, 

Midang ngaihdan i ngai pawimawh zawk a. 

I laka ka lungnih loh ve lahin, 

Thinrim reng mai tiin mi phun khum a. 

Ka kianga kal i hreh ngawih ngawih laiin, 

Lengdang nen nuam ti hmel takin i kal leh lawi a.. 

Inthlahrung taka ka phone ve chhun che pawhin, 

Sawi tur i hre lo emai, dah ang i ti a, 

Sms thawn hman lova i buai em em lai chuan. 

I inbox erawh a khat dul thung si a. 

Vawi tam tak min ti thlawn a, 

Thupha chawina erawh ka tawng ngai lo. 

Heng hi hmangaihna vang a nih chuan, 

Hmangaihna dawn chu ka duh lul love.