Zan khawhar

Zan a rei telh telh a, khawlaia mihring thawm ri pawh hriat tur a awm ta lo. Ri leng vak a zawi tial tial a, kawngpui dunga motor rawn tlan leh zauh thawm lo chu thawm dang reng reng a awm lo. Perhpawng leh khuangchiri ten an aw an chhuahna hun, zan tlai tawh tak, thawm ri zawng zawng a reh thinna hunah chuan ri si lovin thawm ring tak a chhuah tlat si thin a nih hi.

Thawm nei si lo, ring taka ri thin chuan ka beng mai pawh ni lovin, ka thinlung zawng zawng fanchhuakin ka ngaihtuahna, suangtuahna leh mitthla thlengin a khawrhfai leu a. Tui taka i mut lai khan e, kei erawh, chu thawm chuan zanmu mi chhin tir thei lo fo sin.

Enteh, zanin ngeiah pawh thawm a rawn chhuah leh ta a nih hi. A ri hriat tur awm lo mah se, ring takin a au a. Kan nunhlui zawng zawngte kha hmaih palh awm hauh lovin min hrilh nawn leh a. Nunhlui leh kan sulhnu, hmunhlui chang ta maite kha min fanpui leh a sin. Duhtak, ka ngai takzet che a ni.

Ni e, nunhlui liamta te kha min hrilh a, min fanpui a, duhtawk mai se a tha tur. Mahse a la duhtawk hauh lo. Ka ta i nih lohzia min hriat tir awn awn a. Ka hmangaihna che engmah lo maia chang ta chu mi nuihsawhin khumlaizawlah mi trah tir a, thisen chhuak si lovin hliama zawnga tuamdam har ber ka thinlung chu hliampui mi tawrh tirh tak hi.

Thawm riva dang an lo reh a, ri si lova ring taka ri thin chuan e, ka hliamte chu tithar lehin mi trah tir fo thin mah se, engtia tih reh tur nge ka hre si lo. Hriat nawn fo ka duh lova, mahse hriat nawn fo turin thawm a chhuah bang chuang si lo. Mi chimawm tak chu i van ni chiang em! Aw Zan khawharthlak!
25.8.2012