Lasi thawnthu kha

Nizan lamte tlaivar zan a nih vang nge ni, zan dang ang lo takin zanin chu a reh thruap a. Thawm riva leh mihring thawm reng reng hriat tur a awm lo.Hun hlimawm tak, kumthar ni ni mah se, keizawng,he zan khawhar leh reh tak hian min thram vel a, ka lairil a fan leh ta a nih hi.

Van chu ka han thlir a, a thiang mawiin van zawlah arsi an de sep sep a, ka arsi tia ka lo chhal thin, ka naupan lai ata tawh zan tin a lang em tia,ka lo thlir thin chu vanlaizawlah lo lang thiang rualin, khawchhak lama eng chuai raih thla mang lam tawh chuan phairuama tiauchhum luipui ang maia cham dul chu a chhun paw deuh phut a. Lasi thawnthu ang mai ani.

He thlasik boruak vawt takah hian zan danga thawm chhuah thin perhpawng leh khuangchirite pawh an buah vawt tiin an tawm tlat a ni ta ve ang,thawm chhuah zai reng an rel bik lo. Boruak chu hikin vawt hle mah se, thli thaw reng a awm lo a,kan kawmchara fartuah kung thliin a chhem rik sung sung thin pawh chu che miah lovin a ding a, dai rawn far ri leh keuh thin bak chu thawm hriat tur a awm lo, a reh hian a reh tlawk tlawk mai a ni.

Nui ri a reh zo a,tawng thawm a bo zova, mahse thawm reng reng nei lo he zan reh tak hian ngawi rengin thawm ring tak a rawn chhuah si zawng a nih hi. Lunglen a kai tho leh a, hmana ka nun riangvai takah khan trul lovah min hruai kir leh ta a nih hi.

Ka khua a har

K-a dawn kir nunhlui mual hliam hnu,
A- thar hlimtea kan lenlai ni zawng kha.
K-hawiah va truan ta ang maw kan nun kha ,
H-al lotea buan ang pawm laini zawngte,
U-aia chulin thawnthu mai an chang ta si a..
A-wmkhawhar lunglen chang ni hian,
A-saw ral tlang dum dur saw fangin,
H-ril dun leh ila khuarei chang hnu,
A- dam mahna nang ngaih lunglen,
R-iang lovin hlim zai ka vawr ve ngei ang.

I MAY HATE MYSELF IN THE MORNING

Thian hluite nen chaw ei khawm kan han rawt chu a hlawhtling thei tawh dawn lo emaw kan tih hnuah kan puitlin thei ta hram a,kan insawm khawm chhung rei viau mah se,a nía kan han inhmu khawm chiah chu a hlimawm dangdai hle mai, keipawh a tir kha chuan phur sateh lo mah ila, hmana ka hmangaih ni thin, ka hmangaih hmasa ber ni bawk kha a tel ve dawn a ni tih ka hriat avang khan kal ka chak ta em em a nih kha, kum 8 lai liam tawh hnu ami kha tawn leh ka chak em atin ni.

Thian hluite nena kan han inhmu khawm chu kan hlim nak nak hle, kan hmelte a lo dang tawh hlawmin, puitling tak tawh, hnate pawh nei thriau tawhte an lo ni hlawm a, thenkhatin nupui pasalte an lo nei tawh bawk a, hmana ka hmangaih pawh kha kan han titi liam liam takah chuan patling a lo ni ve reng tawh mai, chu thu ka hriat chiah chuan keipawh thlaleh lama pasal nei mai tawh tur ni mah ila, ami deh dan a la dang zar mai zu nia.

Eng eng emaw sawia kan nuih ho dar dar lai chuan "Te" tia ka koh thin ngei mai kha ka bulah rawn thu in zu rim a nam chem chem a, a mak lutuk, a hu hang chu a la na reng mai, a aw thum deuh dut zawi sap mai chuan "inhmuh a va khat ve, i dam maw" a rawn ti a,nula pangngai tak ni tawh mah ila, tleirawl ang maiin ka zak thar leh a nih chu. Ka hmaite chu sa hut hut mai hian ka hria a,ka aw te chu a lai deuh rutin ka hre leh nghal, he ka thinlung ata hi lakbo a lo la ni reng reng lo a nih hi.

Ka phût lo'ng e

I lairil chu lengdang tan niin,
I sakruang chuan mi hlat tawh mah se,
I zunzam par rimtui leng vel hian,
Kianzai reng an rel ve si lo maw.

Kan kara'n mel za tam awm lo mah se,
Ka hnaih phakah i awm ta si lo maw!
I anka dam diai hre thin mah ila.
Ka tan anka i hlan ngai ta si lo.

Hlimin i nui a ni tih hre mah ila,
Keimah vanga nui i ni ta si lo maw!
Lungngaia i tah chang ni lo thlen pawhin,
Hnem tur chein kei mi ko ngai ta si lo..

Nang ngaia i sakhming ka lam chang hian,
Vawikhat tal pawh mi lam ve ta si lo.
Sulhnu chhuia luaithli ka nul lai hian,
Duhtak hmatiang min thlir san ta si maw.

Mahse hei chauh hi ka ngen a che.
Vawiin chauh atan pawh ni se e,
Aw vawikhat tal ka tang bel leh la,
Eng thu mah i sawi ka phut lo'ng e.

Zan

Chhunni kawla'n a lo her liam a,
Beiseina ten mual an liam zova,
Tlaikhua a lo thim tial tial a,
Beidawnnain hringnun a thim hnan e.

Dai leh kawtthlerah a vak vel a.
Thla reng a eng lo, si ar zawngte pawh.
Lungngaihna zo chhum ang a zing ruai a.
A tlu e, lamtluang thima'n.

Chu zan thim hnuaiah chuan,
Tanpuitu tur zawngin a au ruai a,
Tumah rengin an chhang si lo,
Chhingmittui a luang a bianga'n.

Chhungril rum lairil tap chuan e.
Ko hnai e, thihna kut vawt chu.
Damlai thlan thim belh reng ai chuan.
A thlang zawk e,thlafam chan.

Hei erawh hre ve se zawng,
Fam chan a thlang bik hlei lo'ng e.
Khawi hmunah pawh awm ni ila,
'Hmangaihtu Isua chu a hnai reng' tih hi.