Kan ke pen i tichak ang u

Phunchiar tih takah phunna hi a zawn hian kan zawng a, tar hunah phei chuan tho thlawk ringawt pawh kan phun khum duh ang chu. Engmah sawi kaw dawn lo mah ila, phun leh vak vak mai ang aw.

Hei ram chhe te, zau lem lo tak kan nei a, a hmun pawh rualrem lo tak a ni. Mahse kan hla phuahtu hmasa Pu Rokunga te chuan ram hmangaihna thuk tak nen,a ram chhengchhe lai ber pawh a mawina an lo hmu thiam bik a. A ram tan engmah a tih theih loh vanga hrehawm ti em em, Kaphleia te pawn ram hmasawnna turin Inte thawveng atangin mite tan malsawmna a nh ringin thuziak nen 'Thlirtu' ropui tak a rawn ni a.

Kan ram hruaitute pawn kan ram chu an thlir ve teh meuh mai. Eng thlir takin thlir hlawm maw ni. Ram hmasawnna hmuh tur a va tlem si em! Tu te in emaw chu a tha tial tial a, an hnathawh phu lova an hlawh a sang tial tial a,kan vip ber mi retheite erawh an chep tial tial a nih hi.Mahni tapchhak zawlah kan lungawi lohna kan phunpui sep sep a, kan phun lungawi zel chu a ni phawt ang a. Kan lung nih lohna hian rah tha a chhuah har ta em mai.

Mahni pumpui chauh hmangaihtu te hian he ram hi a ti tram mek a, kan retheih a zual zel zawng a nih hi.Ram retheihna hian enge a hrinchhuah, ele eirukna nasa zawkte, khua leh tuite tana duhawm lo ber helna hial pawh a chhuak thei a sin.

Hawh u,thalaite hian kan ram hi thinlung takin i hmangaih thar leh ang u. Rilru zau leh khawvel hmuh atan pawh zahpuiawm loh, Fashiona sang tak tak ni si,central chawm nih reng nih pawh a zahthlak tawh tawk a lawm le. Hna nasa taka thawkin,a dik lo chu paihthla ngama,sawi sep sepa lungawi zel lo hian kan thahrui nen tlangaupui ngam ila, midik lote tana hlauhawm khawpin kan ke pen i tichak ang u. Hei bak ram dang kan nei chuang si lova, Mizo kan nih a bang dawn chuang si lo. Mizo hnam a mualpho chu i phal bikin ka ring lo.
17.12.2012

Duhtak

Duhtak,
Tihian i dawn thin em!
Beisei tur reng ka nei tawh lo tiin,
Lungngaia tapin chhun ni leh zan i hmang a,
Ka tan dam chhan a awm ta lo tiin.

Duhtak,
Lungngaiin rum teh suh khai,
Hun lawmawm tak kan tawng a sin.
I sulhnu nunhlui chu hnawk hle mah se,
Hlimin nui la, tah lai bang ta che.

Duhtak,
Ka hliam hi tihdam rual a ni lo i ti maw,
En teh, damna ka hmu a sin.
Vut aiah pangpar thri lo ni in.
Bawhhlawh kai aiah thianghlimna silhfen chu.

Lawm la, nui zawk ta che

Ka tan dam chhan tur a awm ta lo tiin i nghawngah hrui i valh a, khawvel hrehawm kalsana he lei hnungchhawn i tum mai maw, enteh, hrui kha han la thla la, ka thusawi hi ngaithla phawt ta che.

Hringnun hi a fair lo ngawt mai tiraw, nang phei chu i chan hi a va na dawn rua em! Chhungkaw mumal pawh nei lovin, mite hmuhsit leh endawng nasa taka tuarin, khawhar leh mal takin i awm a,chhungkaw hlim tak neih chakin zanah tu te emaw tui taka an muthilh lai khan i tap fo thin tih pawh ka hai lo.

Hei pawh hi ka hriatpui che a sin, i khawhar hnem turin hmangaih i tawng ve ta a nih kha, kha tih laia i hlimna kha tuman an lei zo kher lo ang le. Mahse he khawvel engmah kumhlun lovah hian i hmangaihna dawn ve chuan rei a daih ta si lo. I thinlung nain a rum a, i hliamte lah tihdam zawh rual lohin a thuk a, i khawvel chu tawp ni mai khan i hria tiraw,

Tin, hei pawh ka hmuh hmaih lo a sin, khawvelah i duh leh mamawh chu i pan ruak ruak a, i neih sumin a tlin bawk a, rualpawl nan tiin Zu.ruihtheihthil leh nulat tlangvalna kawngah i duh tawkin i tal vel a, khawvel chu i chen ve hle a nih kha. Mahse a tawpah zawng mite en hrek hrek, hnung lama nuihzat bur niin, natna tihbaiawm tak AIDS chuan a ei mek ta che a nih hi. rimawi zawngte pawh i bengah an mawi zo tawh lova,tawngtai tur pawhin chakna ka nei ta lo i ti fo thin th ka hai lo. Lungngaia indawm kunin i hun i hmang a,i sualna chu tam hle bika ngaiin ngaihdam theih tawh loh niin i inhria tiraw.

Kumhlui

Sikni eng thlang lenkawlah lo hnim ruai e.
Kumhlui chang mai tura'n, 
Kan hlim, kan lawm lai ni te,
Lungngaih leh tah chang nite zawng,
A her liampui dawn ta maw.

Kan sulhnu kan nun zawng kha,
Khawiah truan zai va rel tak ang maw?
Hriat reng ka duh te lairilah cham reng se.
Nghilh ka duh ngawih ngawihte liampui se.
Kumthar hlimin ka hmang ngei ang.

Hmangaihna chu dawn ka duh lul lo ve

Mal leh khawhar taka ka awm lai khan, 

Ka kiangah nang chu i awm ngai lova, 

I tanpuina ngaia ka koh lai che khan, 

Min hrethiam rawh ka buai em a ni i ti a, 

Ka kiangah rei lote awm ta che ka tih lai khan, 

I hman loh thuin mi chhang a, 

I hnena ka lungawi loh thu ka thlen ve chu, 

Thu ho lam mai maiah i chantir a. 

Nang tihnui ve che ka tum lahin, 

Mi laktlak loh ni hialin min chhuah a. 

Ka hriat ve trul nia ka zawh thin che chu, 

I hriat a trul lo tiin chhanna min pe a.